Yourshot საქართველო CENN-თან თანამშრომლობით და ავსტრიის თანამშრომლობა განვითარებისათვის (Austrian Development Cooperation) ფინანსური მხარდაჭერით, პროექტის – ,,ტყის მდგრადი მართვა სოფლის განვითარებისათვის” ფარგლებში წარმოგიდგენთ “ფოტოსინთეზს” თემით “ტრანსფორმაცია”.
სულ ცოტა ხნის წინ ვერავინ წარმოიდგენდა, რომ 2020 წელს დედამიწის დღის 50 წლის იუბილეს გლობალური პანდემიის და იზოლაციის პერიოდში აღვნიშნავდით. ახალმა კორონა ვირუსმა (COVID 19), რომელმაც მსოფლიო მოსახლეობის უდიდესი ნაწილი სახლში გამოკეტა, ფუნდამენტურად შეცვალა ბევრი რამ და, მათ შორის, ადამიანების სამყაროსადმი დამოკიდებულება.
ჩვენ უცაბედად გამოგვიჩნდა დრო, რომ დავფიქრებულიყავით და ბევრი რამ გადაგვეფასებინა – თვალნათლივ დაგვენახა ის, თუ რამდენად სავალალო შეიძლება იყოს, ისევ ჩვენთვის, ადამიანებისთვის, ველურ ბუნებაში უხეშად ჩარევა და რამდენად შეუძლია ბუნებას, დაიბრუნოს თავისი სახე თუკი ჩვენ, ადამიანები, სულ ცოტა ხნით მაინც მივცემთ შვებას (ან – „ამოსუნთქვის საშუალებას“).
ამ იძულებითი დისტანცირებისას, როდესაც, ძირითადად, ფანჯრებიდან ვადევნებთ თვალს, თუ როგორ იკრეფს ძალას გაზაფხული, ჩვენ გვეძლევა შანსი, გავიაზროთ ის მჭიდრო კავშირი, რომელიც ბუნებასთან გვაქვს და გავიხსენოთ, რომ ჩვენც სწორედ მისი განუყოფელი ნაწილი ვართ – თითქოს ჩვენც გვეძლევა შანსი, განვიცადოთ ტრანსფორმაცია მასთან ერთად და გამოვიღვიძოთ.
გაგვიზიარეთ თქვენი თვალით დანახული ბუნების ტრანსფორმაცია, თქვენი შინაგანი სამყაროს ტრანსფორმაცია და, ასევე, ადამიანისა (მათ შორის, თქვენი) და ბუნების კავშირი.
აიღეთ ფოტოაპარატი და შეეცადეთ, ასახოთ ცვლილებები, რომლებსაც უკანასკნელ ხანს ამჩნევთ – დადებითიც და უარყოფითიც, გვაჩვენეთ სამყაროს თქვენეული, ამჟამინდელი ხედვა.
საკონკურსო დავალების გასაცნობად და მონაწილეობის მისაღებად ეწვიეთ ბმულს.